(no subject)

Vil wol gelopter got, wie selten ich dich prîse!
sît ich von dir beide wort hân und wîse –
wie getar ich sô gefreveln under dîme rîse:
ich entuon diu rehten werk, ich enhân die wâren minne
ze mînem ebenkristen, hêrre vater, noch ze dir!
sô holt entwart ich ir dekeinem nie sô mir.
frôn krist, vater und sun, dîn geist berihte mîne sinne:
wie solde ich den geminnen der mir übel tuot?
mir muoz der iemer lieber sîn, der mir ist guot.
vergib mir anders mîne schulde, ich wil noch haben den muot.

-Walther von der Vogelweide.